Category: Imyidagaduro

Nyuma y’uko indirimbo ye Treason yakiriwe neza n’abakunzi b’injyana ya Dancehall na trap, umuhanzi Scott Damane  ari mu myiteguro yo gusohora EP nshya yise Overseas. Uyu muhanzi scott  Damane amaze igihe yigaragaza nk’umwe mu bahanzi b’abanyempano bafite umwimerere n’ubutumwa bukomeye mu bihangano bye. Indirimbo Treason, yamuhesheje izina rikomeye mu bakunzi ba muzika y”injyana ya hip hop ndetse n’abakunzi bumuziki muri rusange  yaranzwe n’amajwi aryohera amatwi, amagambo y’ukuri n’ijwi ry’umwimerere ryatumye benshi batangira kumwita “the new wave of conscious dancehall.” Scott Damane avuga ko iyi EP Overseas izaba igizwe n’indirimbo nyinshi zigaragaza ubuzima bw’umuhanzi utangiye kuzamuka ku rwego mpuzamahanga, aho buri ndirimbo izaba ifite inkuru yayo itanga ishusho y’ubuzima, urukundo, n’inzozi z’urugendo rwe rwa muzika. “Overseas ni urugendo rw’umutima. Ni EP ivuga ku buzima bwanjye, ku mpamvu zatumye nkomeza gukora n’igihe ibintu bitari byiza. Ndashaka ko abafana banjye bumva ko buri ndirimbo ifite isomo ryayo,” — Scott Damane. Mu butumwa yanyujije ku rubuga rwe rwa Instagram (Scott Damane), Scott Damane yasangije abakunzi be ishusho y’integuza y’iyo EP, ivanze n’amajwi mato y’inyunganizi y’indirimbo nshya. Ibyo byahise bituma abafana be batangira kugaragaza amashyushyu, bamwe bavuga ko Overseas ishobora kuba ari “project ye ikomeye kurusha izindi.” Uretse EP, Scott Damane akomeje gukorana n’abatunganya amajwi n’amashusho bafite ubunararibonye muri muzika nka producer “kush beat “,”kina beat”nabandi, bikaba bizatuma umuziki we ugira umwimerere wihariye, uhuza injyana Ya Dancehall,trap n’umwuka wa Afro-fusion. Iyi EP iteganyijwe gusohoka mu minsi mike iri imbere, ikazaboneka ku mbuga zose zicururizwaho umuziki nka YouTube, Audiomack, Spotify, n’iTunes. Abakunzi be Arabasaba gukomeza kumukurikirana kugira ngo bazabashe kumva neza indirimbo nshya ziri kuri iyo EP, izafasha kumumenyekanisha kurushaho ku ruhando mpuzamahanga.

Nyuma y’igihe gito ashyize hanze indirimbo yise “Follow” yakiriwe neza n’abakunzi b’umuziki nyarwanda, umuhanzi DMC Rwanda yongeye kugaragara ashyira hanze integuza (teaser) y’indirimbo nshya yise Byaranze. Uyu muhanzi, umaze igihe agaragaza imbaraga n’ubushake bwo kwiyubaka mu ruganda rwa muzika, yavuze ko iyi ndirimbo nshya izaba ifite ubutumwa bwimbitse bw’ubuzima bwa buri munsi, cyane cyane ku bantu bahuye n’ibihe bikomeye ariko bagahitamo gukomeza imbere n’iyo ibintu byaba“byaranze”. Dmc Rwanda avugako iyi ndirimbo “Byaranze” Ari indirimbo izaba ifite ubutumwa buzafasha abantu kudacika intege mu ubuzima bwa burimunsi ,ndetse ikaza irimo ubutumwa bwo kwihangana no kwizera ko ejo hari ibyiza nyuma yibigeragezo. DMC Rwanda akomeje kugerageza kubaka izina rye mu muziki nyarwanda biciye mu ndirimbo zifite umwimerere n’amajwi atuje ariko akubiyemo amagambo y’isanamitima. “Follow”,imwe mu ndirimbo ze ziherutse, yagaragaje impano ye mu buryo bwo guhuza injyana ya kizungu n’umuco nyarwanda, bikaba byaramuhesheje abafana bashya n’abakurikirana ibikorwa bye kuri YouTube, DMC Rwanda yagaragaje ko afite gahunda yo gukomeza gukora umuziki mu buryo burambye, akorana n’abatunganya amajwi n’amashusho bafite ubunararibonye mu rwego rwo kongera umusaruro n’ubuziranenge bw’ibihangano bye. Indirimbo Byaranze biteganyijwe ko izasohoka mu minsi mike iri imbere, ikazaba iri ku mbuga zose zicururizwaho umuziki (YouTube, Audiomack, Spotify n’izindi). DMC Rwanda, arasaba abakunzi be gukomeza kumukurikirana kuri YouTube “DMC Rwanda” kugira ngo bazabashe kubonera iyi ndirimbo “Byaranze” kugihe.        

Mu kiganiro cyihariye yagiranye na Uzzi Marley, umunyamakuru wa Ikosora Radio, umuhanzi mushya Queen Bella yagarutse ku rugendo rwe mu muziki no ku nkomoko y’ubushake bwatumye afata icyerekezo cy’ubuhanzi. Queen Bella yavuze ko akiri muto yakundaga cyane umuziki, ariko icyamuteye gutangira gukora indirimbo ze bwite ni ugutera ishyaka n’ubutwari yakuriyemo yumva indirimbo z’umuhanzi Yvan Bravan. “Yvan Bravan yambereye imbarutso yo gukora umuziki,” ni ko Queen Bella yabivuze, agaragaza uburyo indirimbo za Bravan zamubereye urumuri rumwereka ko nawe ashobora gusiga izina mu muziki nyarwanda. Uyu mukobwa wiyumvamo injyana zigezweho yasobanuye ko kumva uburyo Bravan yitangiraga umuziki byamuhaye icyizere cy’uko nawe ashobora kubigeraho. Ati, “Iyo numvaga indirimbo ze, nabonaga ko impano y’umuntu ishobora gutuma abantu bamwumva ndetse ikamufasha kugera kure. Byanyeretse ko n’inzozi zanjye zishoboka Uretse urugendo rwe nk’umuhanzi ku giti cye, Queen Bella aheruka no gukorana n’umuhanzi Androva mu ndirimbo yabo nshya yise “Overdose.” Iyo ndirimbo imaze gutangira kumenyekana ku mbuga nkoranyambaga no kuri YouTube, igaragaza uburyo impano ye yifitemo ubushobozi bwo guhuza injyana zigezweho n’ubwiza bw’amajwi ye yihariye. Queen Bella asobanura ko gukorana na Androva byamufashije kurushaho kwagura ubumenyi bwe mu buryo bwo gutunganya indirimbo no gukorana n’abandi bahanzi bafite ubunararibonye. “Byari urugendo rwiza kandi rutoza byinshi, kandi ndizera ko abafana bazakunda Overdose nk’uko natwe tuyikunda,” ni ko yabitangaje. N’ubwo atarashyira hanze umushinga munini w’indirimbo nyinshi, Queen Bella yemeza ko ari mu myiteguro yo gusohora izindi ndirimbo nshya. Yizeza abafana be ko ibihangano biri imbere bizaba byujuje ubuziranenge, kandi bigaragaza neza urwego rushya umuziki w’abakiri bato uri kugeraho. Uzzi Marley yashimangiye ko impano nk’iya Queen Bella ari ikimenyetso cy’uko umuziki nyarwanda ukomeje kuvumbura abahanzi bashya bafite ijwi ridasanzwe, kandi akangurira abakunzi b’umuziki kumugumana mu maso mu gihe ategura ibikorwa bikomeye biri imbere. KURIKIRA HANO IKIGANIRO KIRAMBUYE QUEEN BELLA YAGIRANYE NA IK RADIO MU KIGANIRO “IMPANO IDASANZWE”  

Umuziki wa hip hop nyarwanda ukomeje kugira imbaraga z’abasore n’inkumi bafite impano nshya, cyane mu njyana ya Rap “Haj P” ni izina rishya rihamya ko ejo hazaza ha rap mu Rwanda hafite icyizere. Uyu musore ukiri muto umunsi kumunsi aragenda ashinga imizi mu ruhando rw’umuziki, akoresheje amagambo akomeye mu njyana ya Hip hop aho yahisemo kuririmba ku buzima bwa buri munsi. Haj P yatangiye kumenyekana binyuze mu ndirimbo zagiye zikora ku mitima y’abakunzi ba hip hop. Uhereye ku ndirimbo “Udasara” ,“Urugendo yakoranye na Remmedy kongwe” Ndetse niyo yise “Umutima,” yagaragaje ko afite ijwi rifite imbaraga kandi amagambo ye akubiyemo ubutumwa. Kuri ubu, indirimbo ye nshya yise “Ibaruwa” ikomeje kugenda ivugwaho cyane, kuko irimo amarangamutima akomeye aho agaragaza uruhande rwe rwo kwigarurira abakunzi ba hip hop. Haj P aririmba mu buryo bujyanye n’imibereho y’abasore n’inkumi b’iki gihe: ibibazo by’urukundo, inzozi z’ubuzima, n’iterambere mu by’ubuhanzi. Haj P akoresha amagambo yoroshye ariko yinjira ku mutima, bigatuma umuryango mugari w’abakunzi ba muzika byumwihariko injyana ya Rap barushaho kumwiyumvamo. Abakurikira umuziki we bavuga ko afite icyerekezo gishya, kuko yunganira injyana gakondo ya hip hop n’umwimerere w’umuco nyarwanda. Abakunzi be muri muzika bamaze kumwita “umwe mu bazahindura hip hop nyarwanda mu myaka iri imbere.” Haj P arimo gukora ku mishinga mishya, harimo no gukorana n’abandi bahanzi b’inshuti ze, kandi arashaka kugera ku rwego mpuzamahanga. Ku bakunzi b’injyana ya rap mu Rwanda, izina Haj P ni iryo kwitaho Dore ko ubwo aheruka kuganira ni tangazamakuru yavuzeko Afite umushinga wo gushyira hanze Ep azatangaza muminsi irimbere. Haj P ni umwe mubatanga ikizere muri Hip hop nyarwanda, Aherutse gushyira hanze indirimbo yise “Umutima”, inkuga yanyu nugukomeza gukurikirana ibikorwa bye.          

Mu mihanda y’i Kigali, ahaturuka amajwi y’ukuri, humvikana izina rigenda rirushaho gukura Shami Shainy, Uyu ni umusore, utari wamenyekana cyane mu itangazamakuru cyangwa mu bitaramo bikomeye, ariko ari kubaka izina rihamye binyuze mu ndirimbo ze amaze gushira hanze. Indirimbo “IKIMENE” ni imwe mu zamenyekanishije Shami Shainy Aho, agaragaza umusore wakuriye mu buzima bugoye, atagira ubufasha buhagije, ariko ugendera ku ntego gukomeza inzira nubwo byaba bigoye. Avuga uko abantu atigeze asinya ngo abe ariwe utsindwa  ariko agahindura uburibwe ubushobozi bwo gukomeza gutera intambwe ,muri hip hop, iyi ndirimbo ntivuga gusa ku mubabaro, ahubwo ni nk’ikirenga cy’ubutumwa buvuga ngo “nawe ushobora gutsinda, uko waba umeze kose” Mu yindi ndirimbo ye “I Ain’t Your League”, Shami Shainy aririmba ku muntu ugomba kumenya agaciro ke, Ni nk’inkingi y’umusore umaze gukura, uzi ko atakiri umwana uvunwa n’amagambo cyangwa abantu batamwemera, Ahamagarira urubyiruko kudashaka kuba ibyo batari, ahubwo kwihangana, bagakora ibyo bashoboye aho bari hose. Mu ndirimbo “Liboma”, Shami Shainy afatanyije n’abandi bahanzi nka Daus na Kweffa, akomeza kugaragaza ubuzima bw’abasore bafite ubushake bwo guhindura ejo hazaza. Indirimbo ibumbatiye ibintu bibiri: ukwishyira hamwe n’inyota yo gutsinda, ariko binyuze mu guhangana n’inzitizi. Icyihariye kuri Shami Shainy ni uko adakora indirimbo zo gushimisha abantu gusa. Iyo usubije amaso inyuma mu bihangano bye, ubona ishusho y’umuraperi utanga ubutumwa mu rugendo rw’ubuzima. Uyu munsi, Shami Shainy ari mu rugendo rwo gukora kuri mixtape atari yashyira ahagaragara, yitezweho uburyohe bwa hip hop i Kigali . Azashyira imbere inkuru zirimo isomo, inama, n’ubutumwa bugamije kuzamura urubyiruko mu rugendo rw’ubuzima. Afite kandi gahunda yo gukora, Collabos n’abandi baraperi bafite umutima nk’uwe. shami shainy ati:“Buri muntu afite icyo ahagarariye. Njyewe nihaye gutuma abatavugwa bavugwa.” Shami Shainy ntabwo yifuza kuba icyamamare kidasanzwe. Icyo yifuza ni ukuba ijwi ry’abakiri hasi, ariko bafite impano, inzozi, n’ukuri kwabo. Urumuri rwe rushobora kuba rutaratse cyane, ariko ni rwo ruzatuma hip hop nyarwanda isubirana ubusobanuro.

Mu buzima bwa muzika nyarwanda, hari amazina agenda azamuka bucece ariko afite ubutumwa bukomeye. Muri abo bahanzi, haza MUTHA II, umusore ukomoka mu Rwanda uzwiho indirimbo yitwa “Gatenga/Kicukiro” yasohotse mu 2021 ku rubuga rwa YouTube.   MUTHA II, izina ritandukanye ariko rifite icyo risobanura, ni umuhanzi washyize imbere umwihariko mu kuririmba ibijyanye n’aho akomoka, ibihe yanyuzemo, ndetse n’umujyi wa Kigali w’ubu. Yavutse, arererwa kandi akura mu karere ka Kicukiro, mu murenge wa Gatenga, aho indirimbo ye yamenyekaniye cyane yitiriye ako gace. Indirimbo “Gatenga/Kicukiro”, niyo yamwinjije ku ruhando rw’abahanzi bari kuvuga Kigali yabo mu ndimi z’umujyi, Iyi ndirimbo igaragaramo amagambo akomeye, asubiza abantu inyuma mu mateka ya Gatenga, uburyo uyu murenge wabaye isoko y’ibitekerezo, imico, n’imihindukire y’isi y’abakiri bato. “Ntitwasa EP”, ariho iyi ndirimbo ibarizwa, igaragaramo uburyo MUTHA II atanga ishusho y’umujyi wiyubaka, ariko wuzuyemo amateka n’amarangamutima. Akoresha amagambo arimo ubuhanga, ibitekerezo bishingiye ku bimenyetso, kandi akabyandika Mu injyana  ya Hip Hop yihariye. Indirimbo” Gatenga_Kicukiro” Igaragaza imihanda ya Gatenga, abana bakina, abantu babaho ubuzima busanzwe, ndetse n’imyubakire y’iki gihe. Ntabwo ari clip y’akataraboneka mu mashusho, ariko Ni video y’ukuri ku buzima bw’umuturage Utuye i Gikondo, Kabeza, Rebero, cyangwa mu gasanteri ka Gatenga. MUTHA II Ni icyerekezo gishya mu muri Hip hop nyarwanda Nu bwo indirimbo ye yamamaye cyane muri Kigali, MUTHA II afite icyerekezo cyo kugeza injyana ye no hanze y’u Rwanda. Ari mu itsinda rya Kosovo Recordz, rifite intego yo guha ijambo abahanzi bafite impano nyayo. MUTHA II ni ijwi rishya, ariko rishingiye ku mizi ya hip hop, Umuziki we ni nk’indorerwamo y’ubuzima bwo mu midugudu ya Kicukiro. Abamukurikirana bemeza ko azavamo umuhanzi ukomeye, kandi ushobora guhindura uburyo abakiri bato batekerezamo umuziki  bitandukanye no kwishimisha, ahubwo ni uburyo bwo gusigasira amateka, kwiyubaka no kwereka isi Kigali y’ukuri.