Mu gitaramo cya Super Bowl cyabaye ku itariki ya 9 Gashyantare 2025, umubyinnyi wari mu itsinda ry’abantu 400 bifatanyije na Kendrick Lamar yagaragaye yerekana ibendera ry’ihuriro rya Sudan na Palestina, ryanditseho amagambo “Sudan” na “Gaza”.
Uyu mubyinnyi, witwa Zül-Qarnain Nantambu, yavuze ko igikorwa cye cyari kigamije kugaragaza solidarite n’abantu bari mu bibazo by’intambara muri ibyo bice. Yongeyeho ko nta muntu n’umwe mu bateguye igitaramo wari uzi umugambi we, kandi ko yihishe ibendera kugeza ku musozo w’igitaramo.
Nyuma yo kugaragaza ibendera, abashinzwe umutekano bahise bamufata, bamukura ku kibuga. Nubwo yakuwe mu kibuga, Polisi ya New Orleans yatangaje ko nta byaha ashinjwa, kandi ko atazagezwa imbere y’ubutabera.
Ishyirahamwe rya NFL ryasohoye itangazo rivuga ko uyu muntu azahagarikwa ubuziraherezo mu bikorwa byose bya NFL, kandi ko igikorwa cye kitari cyateguwe cyangwa ngo kibe cyarigeze gikorwa mu myitozo.
Iki gikorwa cyabaye mu gihe hari intambara zikomeye muri Gaza na Sudan, aho abantu benshi bahuye n’ingaruka zikomeye z’intambara, harimo n’ibihumbi by’abapfuye n’abimuwe mu byabo.