Umuririmbyi wamenyekanye mu irushanwa rya X Factor, Zair Guette, w’imyaka 25, yishwe nyuma yo gushimutwa mu buryo buteye ubwoba. Uyu musore wari umaze kumenyekana kubera impano ye idasanzwe yari agiye kuririmba mu gitaramo ubwo yatewe n’abantu bataramenyekana maze bamujyana ku gahato.
Ku wa Gatanu mu gitondo, umurambo wa Zair Guette wabonetse mu murima w’ibyatsi mu mujyi wa Ginebra, ahantu hitaruye ho muri Colombiya, mu birometero bisaga 30 uvuye mu mujyi wa Cali. Abashinzwe umutekano batangaje ko umurambo we wasanzwe ufite igikomere cy’amasasu, amaboko ye aziritse, ndetse akanwa ke kafunzwe n’agapfukamunwa, ibi bikaba bigaragaza ko yabanje gukorerwa iyicarubozo mbere yo kwicwa.
Amakuru atangazwa n’inzego z’umutekano yerekana ko Zair Guette yashimuswe ku wa Kane nijoro, mu gihe yari mu nzira yerekeza ahari hateganyijwe igitaramo cye. Abantu bitwaje intwaro ngo bamufatiye mu nzira maze bamujyana ahantu hatazwi. Abo mu muryango we batangaje ko nyuma y’amasaha make, abagizi ba nabi babasabye amafaranga kugira ngo barekure uyu muririmbyi, ariko ntibyateye kabiri inkuru mbi irasakara ko yishwe.
Bamwe mu basesenguzi bemeza ko uru rupfu rushobora kuba rufitanye isano n’imitwe y’ubugizi bwa nabi ikorera muri Colombiya, aho abahanzi n’ibyamamare bakunze kuba intego y’ibitero bitandukanye. Hari kandi impungenge ko bishobora kuba bifitanye isano n’amakimbirane yo mu mwuga w’umuziki cyangwa se ibikorwa by’ubujura byibasira abatembera muri aka gace.
Urupfu rwa Zair Guette rwabaye inkuru y’inshamugongo ku nshuti, umuryango we ndetse n’abafana. Umuryango we wavuze ko yari umuntu urangwa n’urukundo n’umwete, kandi wifuzaga kubona impano ye igera kure. Umuvandimwe we yagize ati: “Ntitwigeze twibwira ko ibintu nk’ibi byashoboka. Twarizeye ko bazamurekura nyuma y’uko basabye ingurane, ariko si ko byagenze.”
Bamwe mu baririmbyi bagenzi be ndetse n’abakunzi ba muzika bagaragaje akababaro kabo ku mbuga nkoranyambaga, aho benshi bagaragaje ko babuze impano idasanzwe. Umuririmbyi ukunzwe muri Colombiya yagize ati: “Nta magambo mfite yo gusobanura akababaro mfite. Zair yari inshuti nziza kandi impano ye yari indashyikirwa.”
Polisi ya Colombiya yatangaje ko yatangiye iperereza kuri iki gikorwa cy’ubwicanyi, ikemeza ko izakora ibishoboka byose kugira ngo abakoze ibi byaha babiryozwe. Komiseri wa polisi yavuze ati: “Turimo gukora ibishoboka byose ngo tumenye abo bari inyuma y’iki gikorwa kigayitse. Abaturage turabasaba gutanga amakuru yose ashobora kudufasha kugaragaza ukuri.”
Ubuyobozi bwavuze ko hagiye gufatwa ingamba zikomeye mu gukaza umutekano, cyane cyane ku bahanzi n’ibyamamare bikunze kwibasirwa n’amatsinda yitwaje intwaro. Hari impungenge ko iki gikorwa gishobora kongera ubushyamirane hagati y’inzego z’umutekano n’imitwe y’abagizi ba nabi ikorera muri ako karere.
Nubwo urupfu rwa Zair Guette rwatumye benshi bacika intege, hari icyizere ko ubutabera buzakora akazi kabwo. Umuryango n’inshuti ze basaba ko ubuyobozi bukora ibishoboka byose kugira ngo hamenyekane impamvu nyayo y’urupfu rwe n’ababigizemo uruhare.
Muri iki cyumweru, hateganyijwe igikorwa cyo kumusezeraho bwa nyuma, aho abahanzi, inshuti, n’abakunzi ba muzika bazahurira hamwe bakamuhimbaza, bibuka ubuzima bwe n’impano itazibagirana yari afite.
Iki ni kimwe mu bikorwa bizaba bigamije kwibuka ubuzima bwa Zair Guette no gukomeza gusaba ubutabera kuri we.